ನಿಶ್ಚಿತ

ಚಿಂತೆ - ನೆನಪುಗಳಿಗೆ ತೆಕ್ಕೆಯೊಡ್ಡಿ
ಹಳೆಯ ಕಡತಗಳ ಧೂಳ್ಹೊಡೆದು ತೆಗೆದು
ಒಂದೊಂದನ್ನೇ ಜಾಡಿಸಿ - ದೃಷ್ಟಿ ಹಾಯಿಸಿ
ಇದು ಇರಲಿ, ಇದೂ ಇರಲಿ ಎಂದು
ಎಲ್ಲವನ್ನು ಪುನಃ ಮನದಲ್ಲಿ ಪ್ರತಿಷ್ಟಾಪಿಸಿ
ನಕ್ಕು ಕೆಲವಕ್ಕೆ, ಅಳುತ ಅದು-ಇದಕ್ಕೆ
ಮಿಗಿಲಾಗಿ ಕಳೆಯದೆ ಇಲ್ಲಿಯ ತನಕ ಬಂದ
ಜೀವನದ ಬಂಧಗಳಿಗೆ ಏನೋ ಕಥೆಯ ಕಟ್ಟಿ
ನಾಳೆಯಿದೆಯೆಂಬ ವಿಶ್ವಾಸವಿಲ್ಲದ ನಂಬಿಕೆಯಲಿ
ಹೇಗೋ ತೆವಳುತ್ತ ಹೆಜ್ಜೆ ಒಂದೊಂದ ಎತ್ತಿಡುತ
ಬೇಸರವಿಲ್ಲದ, ಸುಖವಿಲ್ಲದ ಗಳಿಗೆಗಳ
ಮೂಗಿನವರೆಗೂ ಅನುಭವಿಸಿರುವಂದು
ಹೊಸದೊಂದು ವ್ಯಥೆಗೆ ಹೊಸ ಅಧ್ಯಾಯದ
ರಚನೆಯೇ ಬೇಡ, ಎಲ್ಲವೂ ಆಗಿಹೋಗಿದೆ ಎಂದು
ಎಲ್ಲವೂ ಪುನರುಚ್ಚಾರವೆಂದು - ನಡೆಸುತಲಿದೆ.
ಬೇರಿನಲಿ ವಿಷವಿಟ್ಟು ಹಸಿರ ಹೊಮ್ಮಿಸುವ
ಆ ಫಲಿಸದ ಆಸೆಯ ವಸಂತವಾಗಿಸ ಬಯಸಿ
ನೆಲಕಚ್ಚಿದ್ದಕ್ಕೆ ವ್ಯಥೆಯೇ ಇಲ್ಲ - ಎಲ್ಲವೂ ನಿಶ್ಚಿತ!