ಹೊನ್ನಿನ ಉಡಿಗೆ

ಎತ್ತಿ ಕಟ್ಟುವ ಹುಚ್ಚು ಪದಗಳ

ಕೊಚ್ಚಿ ತೂರುವ ಆಸೆಯ -

ಹತ್ತಿ ಉರಿಯುವ ಬಿಚ್ಚು ಮನಗಳ

ಉಕ್ಕಿ ಕೆದಕುವ ಭಾಷೆಯ -

ಬಿತ್ತಿ ಪುಟಗಳ ಸೊಕ್ಕ ಮುರಿಯುವ

ಮುಕ್ಕಿ ತಿನ್ನುವ ಭವಗಳ -

ತಳ್ಳಿ ಬೊಗಳುವ ಮಳ್ಳಿ ಮನಸಿನ

ಸೊಲ್ಲ ಬೆಳಗುವ ಹಣತೆಯ -

ಇಲ್ಲೆ ಉದಿಸುವ ಅಲ್ಲೆ ಮುಳುಗುವ

ನಾಳಿನಾಚೆಯ ಸವಿಗಳ -

ಬೆಳಕ ಬಳಿಯುವ ನಿಶೆಯ ಅಳಿಯುವ

ನವಿರ ಹೂವಿನ ಮುದಗಳ -

ಏಕೆ ನೂಕುವೆ ನಾನೆ ಬೆರೆಯುವೆ

ನಿನ್ನ ತಿರುಳಿನ ಒಡಲಿಗೆ -

ಉಳಿವ ಹೂನಗೆ ಒಡನೆ ಬಂದೊಡೆ

ನಿನ್ನ ನಿಸ್ವನ ತವರಿಗೆ -

ಹೊರಟು ಬರುವೆನು ಮುಗಿಲ ಕರೆವೆನು

ನಿನ್ನ ಹೊನ್ನಿನ ಉಡಿಗೆಗೆ.