ಬೆಳಕು - ನೆರಳು

ಬೆಳಕ ಕೊಟ್ಟ ಸೂರ್ಯನೇ ನೆರಳನ್ನೂ ಇಟ್ಟ
ಬೆಳಕ ಮುಂದೆ ನೆರಳೋ? ಇಲ್ಲ ನೆರಳನೋಡಿಸುವುದಕ್ಕೋ!
ನೆರಳ ಬೆನ್ನಿನಲ್ಲಿ ನಮ್ಮದೇ ಮೂರ್ತಿ
ಅದರ ಹಿಂದೆ ಬೆಳಗುವುದು ಬೆಳಕು
ಬಾಳಿನಾಶಾಗಳಿಗೆಗಳ ಪಕ್ಕದಲ್ಲೇ ಪಕ್ಕೆತಿವಿಯುವ ಭೀತಿ
ಶುಭಾಶುಭಗಳ ಮಿಲನ ಸ್ಥಳದಲ್ಲಿ ಸದಾ ಕತ್ತಲು
ಹೀಗೆ ಬೆಳಕು-ನೆರಳ ಮಿಲನವೂ ಸಹ.
ಚರ್ಯೆಯಿಲ್ಲದ ಆಕಾರವ ಹೊಂದಿರುವ
ನೆರಳೇ ಮೇಲಲ್ಲವೆ - ನಮ್ಮ ವಿಲಕ್ಷಣ ರೂಪಕ್ಕಿಂತ
ಮಾತೂ ಸಹ ಇಲ್ಲ, ಜೊತೆಗೆ ಚಲನೆ ನಮ್ಮಲ್ಲೇ ಸ್ಥಿತ.
ದಾರಿಹೋಕರು ತುಳಿದಾಡಿದರೆ ನೋವಾಗದು ಅದಕೆ
ಕೊಚ್ಚಿ ತುಂಡರಿಸಿದರೂ ರಕುತ ಹೊಮ್ಮಿ ಹರಿಯದು,
ಬೆನ್ನು ಕಾಯಲದರ ಬೆನ್ನ ಹಿಂದೆಯೇ ನಾವು
ಅಪ್ಪಿ ಸಲಹಲದನು ಭೂಮಿ, ಗೋಡೆ, ಇತ್ಯಾದಿ.
ಇವೆಲ್ಲ ಏನಾದರೂ ಇರಲಿ, ನಮ್ಮದೊಂದು ಹೆಮ್ಮೆ
ನಾವಿಲ್ಲದೆ ನೆರಳಿಲ್ಲ!
ಅದಕ್ಕಿಂತ ಹೆಚ್ಚಾಗಿ-
ಸೂರ್ಯನಿಲ್ಲದೆ ನಾವೂ ಇಲ್ಲ - ನೆರಳೂ ಇಲ್ಲ.