ಇಷ್ಟೆ ಸಾಕು

ಕರೆದೊಯ್ಯುವುದೇನು ಬೇಡವೆನ್ನ
ಸಂತೋಷದ ಹೊನ್ನ ಶಿಖರಕ್ಕೆ
ಕರುಣಿಸುವುದೇನು ಬೇಡವೆನಗೆ
ಸುಖವ, ನಿಲುಕಿಸೆನ್ನ ಅದರ ಅತಿರೇಕಕ್ಕೆ
ಬೆವರ ಸುರಿಸಿ ಬದುಕುಳಿಯುವ ಬಾಳಿಗೆ
ಬೆಲೆ ಉಳಿಯುವಂತಾದರೆ ಸಾಕು, ನಿಜಕ್ಕೆ.

ಎಲ್ಲವನ್ನೂ ಸ್ವಾಹಾ ಎನ್ನಬಲ್ಲ ಆ
ಅತಿಯಾದ ಬುದ್ಧಿಯೇನು ಬೇಡವೀ ಜೀವಕ್ಕೆ
ಲೋಕವನ್ನೆ ಆದರ್ಶದೆಡೆಗೆ ಒಯ್ಯಬಲ್ಲ ಆ
ಮಾದರಿ ವ್ಯಕ್ತಿತ್ವದ ಅಗತ್ಯವಿಲ್ಲವೀ ಜೀತಕ್ಕೆ
ಮಾನವೀಯತೆ ಬೇರಿನ ತತ್ತ್ವ ಉಳಿದರೆ ಸಾಕು
ಹೆಮ್ಮರವಾಗಬೇಕೆಂದೇನಿಲ್ಲ ಈ ಸತ್ವಕ್ಕೆ.

ಸ್ವರ್ಗದ ಅಗತ್ಯವಿಲ್ಲ ಈ ಆತ್ಮಕ್ಕೆ ಎಂದೂ
ಇಷ್ಟೆ ಸಾಕು, ಈ ಭೂಮಿ, ಈ ಸಂಸಾರ
ನರಕದ ಹೆದರಿಕೆಯೇನಿಲ್ಲ ಇನ್ನೆಂದೂ
ಇಷ್ಟೆ ಸಾಕು, ದಿನನಿತ್ಯದ ಏರು-ಪೇರು,
ಚಿರನೆನಪಾಗಿರಬೇಕೆಂಬ ಆಸೆಯೇನೂ ಇಲ್ಲ
ಇಷ್ಟೆ ಸಾಕು, ಈ ಕ್ಷಣದಲ್ಲಿ ಪಾಲ್ಗೊಂಡಿದ್ದೇ ಸುಖ!