ಎಲ್ಲದಕ್ಕೆ

ಕವನಗಳೇ ಹೊರ ಹೊಮ್ಮದಿಹ
ಸ್ಥಿತಿ ರೂಪದಲಿ ಮಿಂದು
ಮೌನವ ಸೇರಿನಲಿ ಅಳೆಯುತ
ಬೊಕ್ಕಸ ತುಂಬಿದ್ದಕ್ಕೆ;

ವಿವೇಕವ ದಿಟ್ಟಿಸುತ ನಿಂತ
ಬಿಳಿ ಮುಗಿಲಿನಲಿ ಕಂಡ
ಬಣ್ಣದೆಸಳಿನ ಹೂವುಗಳ
ಮಡಿಲಲ್ಲಿಟ್ಟಿದ್ದಕ್ಕೆ;

ಅನುಭವದಿಂದಾಚೆಯೆ ಉಳಿದ
ಶಬ್ಧಗಳ ತೇವದಲಿ
ಸುಖ ಸುರಿವ ಅನುಭವಗಳ
ಹರಿಸಿ ಹರಸಿದ್ದಕ್ಕೆ;

ಏಕಾಂಗಿಯ ಬೇಸರದಲಿ ಬೆರೆತು
ಕ್ಷಣಗಳ ಸುಗ್ಗಿ ಮಾಡಿ
ಅಂತಿಮದವರೆಗೂ ಅನುಭವಿಸುವಷ್ಟು
ಪೈರ ಬೆಳೆಸಿದ್ದಕ್ಕೆ;

ಜೀವನವೊಂದು ಸೊಗಸೆಂಬುದ
ಆಲಾಪಿಸುತ ಹಾಡಿದ
ನಿನಗೆ ನಾ ಸದಾ ಋಣಿ - ಗೆಳತಿ
ಅದಕ್ಕೆ, ಇದಕ್ಕೆ, ಎಲ್ಲದಕ್ಕೆ.