ಯಾರ ಮರಣ?

ಬದುಕ ಬರಿಯುಡಿಗೆ ಕರುಳ ಬತ್ತಳಿಕೆಯಲಿ

ಬೆರಳ ದೇಗುಲದ ಒಡಕು ಮರುಕದಲಿ

ಹೊರಳಿ ಬರುವ ನಲವಿರುಳ ಬೀಳ್ಕೊಡುಗೆ

ಎರಕ ಹೊಯ್ಯುವ ಮತಿಗೆ ರವಿಯ ತೇಜದಲಿ

ಮೇರುಳಿತದಲಿ ಮಹಡಿ ಮೆಟ್ಟಲಿನ ಗತಿಯಲಿ

ಹೊಯ್ದಾಡುವ ಉಸಿರು ತೆರವ ತೇರೊಳಿತಿನಲಿ

ನಾಳಿಗೆಂಬಾಗುವ ನುಲಿವ ಕರುಣದ ಕರೆಗೆ

ಕುಹಕದಲಿ ಕೊರೆದಿಡುವ ಮೇರುತತ್ವದ ಕುಡಿಕೆ

ಒಡೆದು ಬಾಗಿಹುದು ಅಂತಿಮದ ಸಾರದಲಿ

ಉಳಿವ ಮುಷ್ಠಿಯ ಬೂದಿ ಭಸ್ಮದ ಅಣು ಕಲ್ಪಕೆ

ಯಾವ ಕರೆಯಾದರೇನು ಹೆಸರು ಬೇಕೇನು ಅದಕೆ

ಉಳಿವುದದೆ ಒಳಗಳದ ನಿಜದ ಸಂಚಲಕೆ

ನಾನು, ನಾನೇ, ನನ್ನದೆಂಬ ತಿರುಗು ಬುಗುರಿಯ ಭರಕೆ

ಕುಗ್ಗಿ ಕತ್ತಲೆಯ ಒಳಪದರವ ಹೊದಿಸುವುದಕೆ

ಏನು ಕಾರಣ? ಯಾರ ಹರಣ? ಯಾರ ಮರಣ?