ಸ್ಮರಣೆ

ಬೆರಳ ಬೆಸೆದು, ಒಲವ ಹೊಸೆದು

ಸೂರ್ಯ ಕಿರಣದ ಹಚ್ಚೆ ಬರೆದು

ಹಚ್ಚೆ ಹೂವಿನ ಕಂಪಿನೊಸಗೆ

ಎರೆದು ಬದುಕಿನ ಬರಹ ಪರಿಗೆ

ನಾನು ನಿನ್ನನೆ ಸ್ಮರಿಸುವಾಸೆಯ

ನವಿರ ಪುಳಕಕೆ ಏನ ಹೇಳಲಿ?

ನಲಿವ ಬಣ್ಣವ ಉಲಿವ ಕಣ್ಣಿನ

ಹನಿಯ ಸ್ಪರ್ಶದನುಭವದ ಮಾಯೆಯ

ಬಳುಕ ಬಳ್ಳಿಯ ನಲಿವಿನಪ್ಪುಗೆ

ಹಗುರವಾಗಿಸೆ ಜೀವದಳಲನೆ

ನಾನು ನಿನ್ನನೆ ಸ್ಮರಿಸುವಾಸೆಯ

ಮೆರೆವ ಸ್ಮರಣೆಗೆ ಏನ ಹೇಳಲಿ?

ಅಳಲ ಕಸಿದು, ಬೆಳಕ ಬಸಿದು

ಕಿರಣ ಹೂನಗೆ ಹೊನಲ ಬಳಿದು

ಬದುಕ ಮಾಯೆಯ ಅಣಿಯ ಅಂದಕೆ

ಮಧುರ ಪರಿಯ ಸಂಗೀತ ಮಿಶ್ರಿಸೆ

ನಾನು ನಿನ್ನನೆ ಸ್ಮರಿಸುವಾಸೆಯ

ಹರಿವ ಸಾರಕೆ ಏನ ಹೇಳಲಿ?